Victor Wanyama ashtaki kampuni ya Menengai kwa kutumia picha zake kimakosa

-Kampuni ya Menengai Oil Refineries iliweka picha za Wanyama kwenye mtandao wake wa Twitter wakati wa mashindano ya AFCON 2019

- Wanyama anadai kuwa kampuni hiyo ya Nakuru ilienda kinyume cha hadhi zake

Nahodha wa Harambee Stars, Victor Wanyama, anaripotiwa kuishtaki kampuni ya mafuta ya Menengai kwa madai ya kutumia picha zake kwa matangazo yake.

Nyota huyo wa Tottenham anaaminika kufungua mashtaka dhidi ya kampuni hiyo katika mahakama ya Milimani mnamo Jumatano, Agosti 7, huku akitaka kulipwa fidia baada ya picha zake kutumika bila idhini yake.

Habari Nyingine: Tottenham Hotspur wapenya kujinasia viungo Paulo Dybala na Philippe Coutinho

Kampuni hiyo inasemekana kutumia picha za kiungo huyo wa kati pamoja na mvamizi hatari Michael Olunga na Ovella Ochieng kupitia mtandao wa Twitter wakati wa michuano ya AFCON nchini Misri.

“Kama unaamini unaweza basi sisi kama Menengai tungependa kuwatakia vijana wetu ufanisi katika mashindano ya AFCON," ilisoma taarifa ya kampuni hiyo kwenye Twitter.

Habari Nyingine: Victor Wanyama atoa msaada wa chakula kwa kituo cha mayatima Kawangware

Katika ujumbe mwingine wa kampuni hiyo kwenye mtandao jamii, Menengai iliweka picha ya Wanyama na Olunga wakimkumbatia nyota mwingine wa Ligi Kuu huku akiwa amebeba mpira.

Hata hivyo, Wanyama anateta kuwa picha hizo zilitumiwa bila ya idhini yake, kwa hivyo ilikuwa kinyume cha hadhi zake.

Pia alidai kuwa ujumbe huo haukuwa wa kuitakia Harambee Stars ufanisi katika mtanange huo wa bara, bali kutangaza bidhaa za kampuni hiyo.